ଏବେ କିଛି ଦିନ ପୂର୍ବେ ସାଉଦୀ ଆରବ ସରକାର ତବଲୀଗୀ ଜମାତ ଓ ଅନ୍ୟ ଦାବା ସଂଗଠନ ଗୁଡିକୁ ନିଷିଦ୍ଧ ଘୋଷଣା କରିଛନ୍ତି । ଗତ ୨୦୨୦ ମସିହା ମାର୍ଚ –ଏପ୍ରିଲ ବେଳକୁ ତବଲୀଗୀ ଜମାତ ଭାରତରେ ଚର୍ଚାର କେନ୍ଦ୍ର ବିନ୍ଦୁରେ ଥିଲା ଯେତେବେଳେ ସେ ସରକାରଙ୍କ ନିର୍ଦେଶନାମାକୁ ଅମାନ୍ୟ କରି ଦିଲ୍ଲୀର ନିଜାମୁଦ୍ଦିନ ଠାରେ ମକରଜ କରିଥିଲା ଓ ସେଥିରେ ଦେଶ ବିଦେଶରୁ ହଜାର ହଜାର ଜମାତୀ ସାମିଲ ହୋଇଥିଲେ । ଏବେ ସାଉଦୀ ଆରବ ଏହି ସଂଗଠନକୁ ନିଷିଦ୍ଧ କରିବା ପରେ ପୁଣି ଥରେ ଏହି ସଂସ୍ଥା ଚର୍ଚାକୁ ଆସିଛି ।
ତବଲୀଗ ଜମାତ ବିଷୟରେ ଲୋକ ମାନେ କ୍ୱଚିତ ଜାଣନ୍ତି । ସାଧାରଣ ଲୋକଙ୍କ ଠାରୁ ବିଦ୍ୱାନ, ବୁଦ୍ଧିଜୀବା ଲୋକ ମାନଙ୍କ ଯାଏ କାହାରିକୁ ଏ ବିଷୟରେ ବିଶେଷ ଜଣା ନାହିଁ । ତବଲୀଗ ଅର୍ଥାତ ପ୍ରଚାର । ଏହାକୁ ଇସଲାମୀ ଶବ୍ଦାବଳୀରେ ଦାବା ବୋଲି ମଧ୍ୟ କହିଥାନ୍ତି, ଯାହାର ଅର୍ଥ ହେଲା ନିମନ୍ତ୍ରଣ ଦେବା, ପ୍ରେରିତ କରିବା, ତା ଉପରେ ଜୋର ଦେବା ଆଦି । ତେଣୁ ତବଲୀଗୀ ଜମାତ ଠିକ ଇସଲାମକୁ ଆପଣାଇବା, ପ୍ରତ୍ୟେକ ଅଣ ମୁସଲମାନ ଜିନିଷକୁ ଛାଡିବାକୁ ପ୍ରଚାର/ ଦାବା କରିଥାଏ । ଏଥିରେ ଖିଆ ପିଆ, ବେଶ ଭୂଷା, ବିଚାର- ମାନ୍ୟତା, ରହିବାର ଶୈଳୀ ଆଦି ସାମିଲ ରହିଥାଏା
ତବଲୀଗୀ ଜମାତର ପ୍ରତିଷ୍ଠାତା ମୌଲାମା ମୁହମ୍ମଦ ଇଲିୟାସ ଥିଲେ ଓ ସେ ବର୍ତମାନର ହରିଆଣାର ମେବାତ ଅଂଚଳରେ ଏହି ସଂସ୍ଥା ଆରମ୍ଭ କରିଥିଲେ । ତବଲୀଗୀ ଜମାତର ବାର୍ତା ବଡ ସରଳ । ଜମାତର ବାର୍ତା ହେଲା –“ହେ ମୁସଲମାନ ମାନେ, ମୁସଲମାନ ହୁଅ” । ଇଲିୟାସ ପ୍ରଥମେ ସହାରନପୁର ମଦ୍ରାସାରେ ପଢାଉଥିଲେ ଓ ମଦ୍ରାସାର କାମକୁ ଅସନ୍ତୋଷଜନକ ବୋଲି ମନେ କରି ସେ ଏହାକୁ ଛାଡି ଦେଇ ତବଲୀଗର ମିଶନ ଆରମ୍ଭ କରିଥିଲେ । ପ୍ରସିଦ୍ଧ ଇସଲାମୀ ବିଦ୍ୱାନ ମୌଲାନା ବହିଦୁଦ୍ଦିନ ଖାନଙ୍କ ପୁସ୍ତକ ‘ତବଲୀଗୀ ମୁଭମେଂଟ’ (୧୯୮୬)ରେ ଏ ସମ୍ପର୍କରେ ପ୍ରାମାଣିକ ସୂଚନା ମିଳେ ।
ଏହି ସଂସ୍ଥାର ପ୍ରତିଷ୍ଠାତା ମୌଲାନା ଇଲିୟାସଙ୍କୁ ଏ କଥା ଭାରୀ କଷ୍ଟ ଦେଉଥିଲା ଯେ ଦିଲ୍ଲୀ ଆଖପାଖ ଅଂଚଳରେ ଯେଉଁ ଲୋକ ମାନଙ୍କୁ ବିଦେଶୀ ଆକ୍ରମଣକାରୀ ଶାସକଙ୍କ ସମୟରେ ଇସଲାମରେ ମତାନ୍ତରିତ କରା ଯାଇଥିଲା ସେମାନଙ୍କ ମଧ୍ୟରେ ମୁସଲମାନ ଭଳି କିଛି ନ ଥିଲା । ଶହ ଶହ ବର୍ଷ ବିତି ସାରିଥିଲେ ସୁଦ୍ଧା ସେମାନେ ଅନେକ ମାତ୍ରାରେ ହିନ୍ଦୁ ଭଳି ଚଳୁଥିଲେ । ଉଦାହରଣ ସ୍ୱରୂପ ସେମାନେ ଗୋମାଂସ ଖାଉ ନ ଥିଲେ, ନିଜର ପରିବାରରେ ବିବାହ କରୁ ନ ଥିଲେ , କେହି କେହି ହିନ୍ଦୁ ପର୍ବ ପର୍ବାଣୀ ପାଳନ କରୁଥିଲେ, ଦେବୀ ଦେବତାଙ୍କୁ ଆଦର କରୁଥିଲେ, ଧୋତି ପିନ୍ଧୁଥିଲେ, କୁଣ୍ଡଳ, କଡା ଆଦି ପିନ୍ଧୁଥିଲେ, ଶିଖା ରଖୁଥିଲେ । କେବଳ ସେତିକି ନୁହେଁ ଏହି ମତାନ୍ତରିତ ମୁସଲମାନ ମାନେ ଶହ ଶହ ବର୍ଷ ବିତି ଯାଇଥିଲେ ସୁଦ୍ଧା ସେମାନଙ୍କର ନାମ ଓ ସାଙ୍ଗିଆ ଆଦି ହିନ୍ଦୁ ରଖୁଥିଲେ । କିଛି ଲୋକଙ୍କୁ ତ କଲମା ପଢି ଆସୁ ନ ଥିଲା । ଯେତେବେଳେ କୌଣସି ପକ୍କା ମୁସଲମାନ ଠିକ ଠାକ ଭାବେ ନମାଜ ପଢୁଥିଲା ତାକୁ ସେମାନେ ଅତ୍ୟନ୍ତ କୌତୁହଳର ସହ ଦେଖୁଥିଲେ ।
ରାଜସ୍ଥାନର ଅଲବରରେ ଉନବିଂଶ ଶତାବ୍ଦୀର ଶେଷ ସମୟରେ ବନ୍ଦୋବସ୍ତ ଅଫିସର ଭାବେ କାମ କରିଥିବା ଇଂରେଜ ଅଧିକାରୀ ମେଜର ପିୟୋଲେ ଲେଖିଛନ୍ତି – ‘‘ମେବାତୀ ମୁସଲମାନ ମାନେ ନିଜ ପରମ୍ପରା ଓ ସ୍ୱଭାବରୁ ଅଧା ହିନ୍ଦୁ ଥିଲେ । ‘‘ ଏଥିରୁ କ୍ଷୁବ୍ଧ ହୋଇ ମୌଲାନା ଇଲିୟାସ ମୁସଲମାନ ମାନଙ୍କୁ ଠିକ ରାସ୍ତାରେ ଆଣିବାକୁ ମିଶନ ଅର୍ଥାତ ତବଲୀଗୀ ଜମାତ ଆରମ୍ଭ କରିଥିଲେ । ତାଙ୍କର ଏହି ସଂସ୍ଥାର ଏକ ମାତ୍ର ଉଦ୍ଦେଶ୍ୟ ଥିଲା ଯେ ଦେଶଜ ମୁସଲମାନ ମାନଙ୍କୁ ହିନ୍ଦୁ ମାନଙ୍କ ଠାରୁ ଅଲଗା କରିବା , ଯଦ୍ୱାରା ମୁସଲମାନ ମାନଙ୍କୁ ଖରାପ ପ୍ରଭାବରୁ ବଂଚା ଯାଇ ପାରିବ ।
ମୌଲାନା ବହିଦୁଦ୍ଦିନ ତାଙ୍କର ପୁସ୍ତକରେ ଏହାର ଖୁବ ପ୍ରଶଂସା କରି ଲେଖିଛନ୍ତି ଯେ କିଛି ଦିନ ଯାଏ ଇସଲାମୀ ବ୍ୟବହାରର ପ୍ରଶିକ୍ଷଣ ଦେଇ ସେହି ଦେଶଜ ମୁସଲମାନ ମାନଙ୍କୁ ସେ ‘ନୂଆ ମନୁଷ୍ୟ’ ରେ ପରିଣତ କରି ଦେଇଥିଲୋ । ଏହି ‘ନୂଆ ମନୁଷ୍ୟ’ ର ଅର୍ଥ ହେଲା ଯେ ସେ ଏହି ଦେଶଜ ମୁସଲମାନ ମାନଙ୍କୁ ସେମାନଙ୍କର ମୂଳରୁ ଅଲଗା କରି ଦେବା, ତାଙ୍କ ମସ୍ତିଷ୍କକୁ ସଫା କରି ପ୍ରତ୍ୟେକ ବିଷୟରେ ହିନ୍ଦୁ ମାନଙ୍କ ଠାରୁ ଅଲଗା କରି ଦେବା ଥିଲା । ବିଭିନ୍ନ ଉପାୟରେ ସେମାନଙ୍କ ମନରେ ହିନ୍ଦୁ ମାନଙ୍କ ପ୍ରତି ଦୁର୍ଭାବନା ତିଆରି କରି ବିଶେଷ ରୂପେ ତାଙ୍କର ପୋଷାକ, ଦାଢି, ଖାଇବା - ପିଇବା ଆଦିକୁ ଆପଣାଇ ସେମାନଙ୍କୁ କେବଳ ଇସଲାମୀ କରା ଗଲା ।
ଏମାନଙ୍କୁ ‘ନୂଆ ମନୁଷ୍ୟ’ କୁହାଗଲା । ତବଲୀଗରୁ ପ୍ରଶିକ୍ଷିତ ହୋଇ ଫେରିଥିବା ମୁସଲମାନ ମାନେ ସ୍ଥାନୀୟ ମେବାତର ଦେଶଜ ମୁସଲମାନଙ୍କ ମଧ୍ୟରେ ସେହି କଥାକୁ ପ୍ରଚାର କରିବା ଆରମ୍ଭ କଲେ । ଏହି ଅଂଚଳରେ ମସଜିଦର ସଂଖ୍ୟା ବଢିବାରେ ଲାଗିଲା । ଏହା ଫଳରେ ମେବାତ ଅଂଚଳର ପୂରା ପୁରି ଭାବେ ବଦଳିଗଲା ।
ହିନ୍ଦୁ ମାନଙ୍କ ସହ ମିଳି ମିଶି ରହୁଥିବା ମୁସଲମାନ ମାନଙ୍କୁ ଦୂର କରିବା ଏହାର ଉଦ୍ଦେଶ୍ୟ ଥିଲା । ଦେଶଜ ମୁସଲମାନଙ୍କୁ ଶରିୟତ ଅନୁସାରେ ଜୀବନ ଜୀଇବାକୁ ପ୍ରେରିତ କରିବା, ନିଜର ପୂର୍ବ ପୁରୁଷ ମାନଙ୍କର ରୀତି ନୀତି, ସଂସ୍କୃତି ପରମ୍ପରାକୁ ଘୃଣା କରିବା, ଅନ୍ୟ ମୁସଲମାନଙ୍କୁ ଏଥିପାଇଁ ପ୍ରେରଣା ଦେବା ଏମାନଙ୍କର ଉଦ୍ଦେଶ୍ୟ ଥିଲା ।
୧୯୧୯ ମସିହାରେ ଯେତେବେଳେ ତୁର୍କୀର ଖଲିଫା ପାଇଁ ଖିଲାଫତ ଆନ୍ଦୋଳନ ହେଲା ସେତେବେଳର କଂଗ୍ରେସ ନେତୃତ୍ୱ ଏହାକୁ ସମର୍ଥନ କରିଥିଲା । କଂଗ୍ରେସର ସମର୍ଥନ ସେତେବେଳେ ତବଲୀଗୀ ଜମାତର ଏଜେଣ୍ଡାକୁ ଆହୁରି ବଳ ପ୍ରଦାନ କଲା । ଖିଲାଫତ ଆନ୍ଦୋଳନର ଲାଭ ଉଠାଇ ମୂଳ ଇସଲାମ ଓ ସାଧାରଣ ମୁସଲମାନ ମାନଙ୍କର ଦୂରତ୍ୱକୁ କମ କରିବା ସହ ସେମାନଙ୍କୁ ହିନ୍ଦୁ ସମାଜରୁ ଦୂର କରିବାରେ ସହାୟତା ମିଳିଲା ।
ମୋଟ ଉପରେ ଯଦି ଆମେ ସରଳ ଭାଷାରେ କହିବା ତେବେ ତବଲୀଗୀ ଜମାତ ଭାରତର ଦେଶଜ ମୁସଲମାନ, ଯେଉଁ ମାନେ ଭାରତର (ଆରବର କିମ୍ବା ବିଦେଶୀ ନୁହନ୍ତି) ମାନଙ୍କ ମନରେ କଟ୍ଟରତା ଭର୍ତି କରିବା ଓ ହିନ୍ଦୁ ମାନଙ୍କ ଠାରୁ ସେମାନଙ୍କୁ ଦୂର କରିବା ଦିଗରେ କାମ କରି ଆସୁଛି । ଯେଉଁ ଠାରେ ଦେଶଜ ମୁସଲମାନ ମାନେ ଇସଲାମ ଗ୍ରହଣ କରିବା ସତ୍ବେ ତାଙ୍କର ପୂର୍ବପୁରୁଷଙ୍କ ସଂସ୍କୃତି ଓ ପରମ୍ପରାକୁ କିଛି ମାତ୍ରାରେ ନିର୍ବାହ କରୁଥିଲେ ତାକୁ ଛଡାଇବା ଓ ସେମାନଙ୍କୁ କଟ୍ଟର କରି ହିନ୍ଦୁଙ୍କ ବିରୁଦ୍ଧରେ ବୈମନସ୍ୟ ବଢାଇବାର ପ୍ରୟାସରେ ଲଗାତାର କାମ ଚାଲିଛି ।
ଇସଲାମ ଯେଉଁ ଠାରୁ ଆରମ୍ଭ ହୋଇଛି ସେହି ଦେଶ ହିଁ ଏବେ ତବଲୀଗୀ ଜମାତକୁ ନିଷିଦ୍ଧ ଘୋଷଣା କରିଛି । ସବୁଠାରୁ ବଡ କଥା ହେଉଛି ସାଉଦୀ ଆରବ ତବଲୀଗୀ ଜମାତକୁ ବ୍ୟାନ କରିବାକୁ ଯାଇ ଏହାକୁ ଆତଙ୍କବାଦର ଦ୍ୱାର ବୋଲି କହିଛି ।
ସାଉଦୀ ଆରବର ଇସଲାମୀ ମାମଲାର ବିଭାଗ ପକ୍ଷରୁ ଟ୍ୱିଟ କରି ଏହି ସୂଚନା ଦିଆ ଯାଇଛି । ଏଥିରେ କୁହା ଯାଇଛି - ମନ୍ତ୍ରୀ ଡ. ଅବଦୁଲ୍ଲାତିଫ ଅଲ ଶେଖ ତବଲୀଗୀ ଜମାତ ଓ ଦାବାହ ସମୂହ ଉପରେ ବ୍ୟାନ ଲଗାଇ ଦେଇଛନ୍ତି । ବିଭାଗ ପକ୍ଷରୁ କରା ଯାଇଥିବା ଟ୍ୱିଟରେ ସମସ୍ତ ସମଜିଦର ଇମାମ ମାନଙ୍କୁ ଶୁକ୍ରବାର ନମାଜରେ ଆସୁଥିବା ଲୋକ ମାନଙ୍କୁ ଏ ସମ୍ପର୍କରେ ସୂଚନା ଦେବା ପାଇଁ ଏହି ସଂଗଠନରୁ ଦୂରରେ ରହିବାକୁ ପ୍ରେରିତ କରିବାକୁ କୁହା ଯାଇଛି । କେବଳ ସେତିକି ନୁହେଁ ସାଉଦୀ ସରକାର ମସଜିଦର ଇମାମ ମାନଙ୍କୁ ତାଙ୍କର ନମାଜ ଭାଷଣରେ ଏହି ଦୁଇ ସଂଗଠନର ବିପଦ ସମ୍ପର୍କରେ ମଧ୍ୟ ଅବଗତ କରାଇବାକୁ ନିର୍ଦେଶ ଦେଇଛନ୍ତି । ଶୁକ୍ରବାର ନମାଜ ସମୟରେ ଇମାମ ମାନେ ନିମ୍ନ ଲିଖିତ ବିଷୟରେ କହିବେ ଓ ଲୋକଙ୍କୁ ଅବଗତ କରାଇବେ ବୋଲି ଏଥିରେ କୁହା ଯାଇଛି ।
ସାଉଦୀ ଆରବ ସରକାରଙ୍କ ଏହି ନିଷ୍ପତିର ସମଗ୍ର ବିଶ୍ୱରେ ବିଶେଷ ଭାବରେ ଭାରତ ଉପରେ ଦୀର୍ଘକାଳୀନ ପ୍ରଭାବ ପଡିବାକୁ ଯାଉଛି । କାରଣ ସାଉଦୀ ସରକାର ଏହି ସଂସ୍ଥାକୁ କେବଳ ନିଷିଦ୍ଧ ଘୋଷଣା କରି ନାହିଁ ବରଂ ଏହାକୁ ଆତଙ୍କବାଦର ଦ୍ୱାର ବୋଲି କହିଛି । ସାଉଦୀ ଆରବର ସଂଗଠନକୁ ନିଷିଦ୍ଧ କରାଯିବା ଘୋଷଣା ପରେ ଏହି ସଂଗଠନ ର କାର୍ୟ୍ୟକଳାପ ବିଭିନ୍ନ ଦେଶର ସ୍କାନରେ ଆସିବ ବୋଲି ଆଶା କରା ଯାଉଛି ।